✅ البوست عن موضوع مهم جداً هو الصيام والسكر ومين يصوم ومين مايصومش وده يبقى مرجع لأى حد عنده سكر أو أى شيخ عشان يفتى للناس بالإفطار لأنه لازم يكون مُلم بالخطورة.
⬅️ النقطة الأولى : عايز اشرح الدورة الدموية ازاى بتتأثر بالصيام:
✅ الدورة الدموية عبارة عن مواسير صغيرة شايلة الدم فى الجسم بتوصله للمخ والقلب والعضلات والأعضاء المختلفة وهانشبه المواسير الصغيرة دى بالشفاطة .. والدم اللى جواها بالمياه.
✅ هاسألك سؤال وتفكر فيه؟ لو حطيت فى الشفاطة دى مياه وفى شفاطة تانية عسل اسود .. حركة أى سائل هاتكون أسرع؟
أكيد حركة المياه ليه ؟ لأن المياه سائلة أكتر ومش لزجة زى العسل الأسود
عشان نحافظ على سريان الدم بالشكل الطبيعى لازم مايبقاش لزج ولازم يبقى سائل بدرجة معينة.
جميل ندخل على النقطة التانية:
⬅️ النقطة التانية : هل الدم بتاعنا ممكن اللزوجة بتاعته تزيد وتبقى زى العسل الأسود؟
✅ الإجابة أيوا طبعاً .. في حالات كتير لكن هانتكلم عن موضوعنا النهاردة فى السكر.
ليه اللزوجة دى بتحصل فى أصدقاء السكر؟
⛔️ السبب الأول حاجة اسمها إدرار البول الأسموزى أو إدرار البول التناضحى وده يعنى ان السكر لما يزيد بيطرد المياه من الجسم ويخلى الإنسان يتبول أكتر.
طيب ايه النتيجة اللى بتترتب على كده؟
بيترتب عليه إنى بافقد مياه كتير وباحتفط بسكر فى الجسم .. يعنى العسل الأسود بدل ما ازوده مياه عشان اخففه عشان يجرى بسرعة بانقص منه المياه .. وبالتالى الدم هايبقى سميك ولزج.
⛔️ السبب التانى .. هو الصيام المفروض بعد اللى شرحناه فى إدرار البول التناضحى ان احنا نشرب مياه كتير جدا عشان نقلل اللزوجة دى ونعوض الفاقد فى البول لكن للأسف بنصوم وبنمنع المياه فالسببين اللى قلنااهم تأثيرهم بيبقى أضعاف مضاعفة.
⛔️ السبب الثالث.. بقى اللى يزيد الطين بلّة هوا ان حضرتك فى الصيام خاصة لو رمضان فى الصيف بنفقد سوائل أكتر عن طريق العرق والنفس فالدم بيبقى بالضبط عبارة عن عجينة أسمنت بدون مياه.
⬅️ ايه خطورة اللزوجة اللى قلنا عليها دى؟
✅ تخيل معايا تانى الشفاطة اللى فيها مياه والشفاطة اللى فيها عسل اسود (يعنى دم لزوجته عالية) وشوف سرعة الدم فيهم عاملة ازاى مين الأسرع ؟ المياه طبعا .. ومين الأبطـأ؟ العسل. يبقى الدم اللزج سرعته فى الدوران أقل بكتير ..
⬅️ يعنى ايه برده مش فاهم؟
✅ يعنى قلة سرعة الدورة الدموية دى عندنا فى الطب هى المسبب الرئيسى للجلطات سواء جلطات قلب جلطات مخ
⬅️ ليه يعنى بتسبب جلطة يا دكتور؟
✅ ببساطة أوى دون تفاصيل .. لما الدم بيكون لزج وسرعته بطيئة سهل جدا يكلكع ويتكون فيه كلاكيع صغيرة والكلكوعة الصغيرة دى بتمشى فى الدم وتروح ترشق فى حتة هى ونصيبها زى المخ أو القلب وتسد الشريان وده اسمه جلطة وده غالباً بيروح للأعضاء الكبيرة.
⬅️ يبقى مين الناس اللى ما تنفعش تصوم؟
✅ صديق السكر النوع الأول (ممنوع منعاً باتاً) ولما ماتصومش حضرتك بتستخدم الرخصة اللى ربنا اداهالك
ربنا سبحانه وتعالى قال : أَيَّامًا مَّعْدُودَاتٍ ۚ فَمَن كَانَ مِنكُم مَّرِيضًا أَوْ عَلَىٰ سَفَرٍ فَعِدَّةٌ مِّنْ أَيَّامٍ أُخَرَ ۚ وَعَلَى الَّذِينَ يُطِيقُونَهُ فِدْيَةٌ طَعَامُ مِسْكِينٍ ۖ فَمَن تَطَوَّعَ خَيْرًا فَهُوَ خَيْرٌ لَّهُ ۚ وَأَن تَصُومُوا خَيْرٌ لَّكُمْ ۖ إِن كُنتُمْ تَعْلَمُونَ (184) البقرة
هانعمل ايه؟🤔 تطعم عن كل يوم مسكيناً .. شوف حضرتك تكلفة فطارك وسحورك بكام جنيه اضربها فى 30 واديها لناس او اتبرع بها لحاجة خيرية عشان يطعموا الناس.
✅ السكر النوع التانى غير المنتظم لو السكر عنده فى الشهور التلاتة السابقة لرمضان غير منتظم يبقى ما ينفعش يصوم.
✅ السكر النوع التانى اللى حصل له مشكلة من مشاكل شبكية العين أو الكلى.
✅ السكر النوع التانى لأى حد عايش لوحده (لأن ماحدش هايلحقه لو لاقدر الله حصل له حاجة).
⬅️ إيه الأخطار التانية اللى ممكن تحصل نتيجة الصيام لأصدقاء السكر؟
⛔️ عرضة كبيرة جداً للجلطات زى ما شرحنا.
⛔️ غيبوبة السكر بسبب الهبوط الحاد فى مستوى السكر أثناء الصيام وده كابوس بالنسبة للأطباء .. لأن الهبوط الحاد فى مستوى السكر فى الدم مسئول عن وفاة 4% من حالات الصيام فى أصدقاء السكر وخاصة.
⛔️ الزيادة العالية جداً فى مستوى سكرى الدم أثناء الصيام وده برده خطر جداً والحالات دى لازم تتحجز فى الرعاية المركزة.
⬅️ الناس اللى عندها سكر النوع التانى وعايزة تصوم تعمل ايه فى أكلها؟
✅ تقلل البلح والمشمش فى الأكل عشان فيهم بوتاسيم كتير.
✅ نشرب مياه كتير جداً بدءًا من أذان المغرب لحد أذان الفجر بشكل متواصل ودى قاعدة لأى حد .. ما نعملش زى الجمل نيجى نشرب 2 لتر مياه قبل الفجر عشان بعد الفجر حضرتك هاتدلقهم تحت الكوبرى.
✅ الإكثار من الألياف والخضروات والسلطات كل عشر أطباق سلطة لو تقدر.
✅ بالراحة شوية على القطايف والبسبوسة والحاجات دى.
✅ نقلل من المقلى والمحشى والمشوى والزيوت والسمنة.
⬅️ لو انا صديق السكر النوع التانى امتى افطر؟
⛔️ لو حسيت بهبوط فى مستوى السكر الرقم 60 يبقى تفطر فوراً مفيش نقاش.
⛔️ لو قست السكر وطلع 300 أو أعلى تفطر فوراً ليه ؟؟ عشان كل ما كمية السكر يعلى كل ما بتزيد لزوجته زى ما اتفقنا.
⬅️ يا دكتور حضرتك انا باصوم بقالى 10 سنين والحمد لله ما حصلش حاجة.
✅ يبقى ربنا بيحبك وحماك من المكروه والنصائح دى هاتكون حجة عليك وربنا ستر مرة والتانية والتالتة ما تضمنش الرابعة ربنا يعافيكم جميعاً.
⛔️ كلمة أخيرة: أهلك وذويك واخواتك وأسرتك محتاجينك ماتغامرش ولا قدر الله لو حصل أى مكروه ربنا هايسسألك صمت ليه وأنا مديك رخصة للإفطار.
ربنا يتقبل منكم جميعاً إفطاركم وصدقاتكم وكل الأعمال الصالحة.
⬅️ رجاء انشروا البوست ده بأقصى ما يمكن عشان الناس تستفاد ممكن تكون سبب فى منع مكروه.
✅ مشاركتك للمنشور قد تساعد في حماية الآخرين من الخطر منقول ..
تعليقات